Тыдзень беларускай мовы, літаратуры і культуры
Тыдзень беларускай мовы,
літаратуры і культуры
Ужо стала добрай традыцыяй штогод праводзіць у школе прадметныя тыдні і дэкады, якія садзейнічаюць пашырэнню кругагляду вучняў, павышэнню агульнай культуры і развіццю асобы навучэнцаў. Не стаў выключэннем і нынешні навучальны год. Так, з 20 лютага па 27 лютага у школе праходзіў Тыдзень беларускай мовы, літаратуры і культуры. Як звычайна, была агаворана галоўная умова Тыдня: ўсім без выключэння вучням і настаўнікам размаўляць па-беларуску. Беларуская мова загучала ўсюды: на перапынках, на ўроках (не толькі беларускай мовы і літаратуры), у сталоўцы, у прыватных гутарках вучняў.
Распачаўся Тыдзень правядзеннем Рэспубліканскага конкурсу “Буслік – 2014”, у якім прынялі ўдзел 79 вучняў школы. У Дзень роднай мовы была арганізавана алімпіяда па беларускай мове і літаратуры. Яе пераможцамі сталі:
Зубрык Вікторыя (5 клас)
Чуйко Арына (6 “А” клас)
Лапато Ульяна (7 “А” клас)
Несцер Дзмітрый (8 “А” клас)
Віншуем нашых пераможцаў і жадаем ім поспехаў на раённым этапе!
Працягам Тыдня стала віктарына па праказках “Ад прадзедаў спакон вякоў…”, якая была праведзена для вучняў 4-6 класаў. У ходзе мерапрыемства ўдзельнікі з вялікай ахвотай выконвалі заданні, звязаныя з духоўнай спадчынай нашых продкаў: пабылі і даследчыкамі, і перакладчыкамі, і артыстамі, і аўтарамі ўласных прыказак.
У суботні дзень для вучняў школы была наладжана экскурсія-выстава
З вялікім поспехам прайшоў “Турнір рыцараў слова” для вучняў 7-8 класаў. Яго ўдзельнікі (Алеферовіч М., Міхалкевіч Я., Несцер Д., Раманоўскі У., Дробуш У., Пенда У.) змагаліся за тытул “Рыцар слова”. Найбольшых поспехаў дабіўся Міхалкевіч Я. Ён і стаў пераможцам турніру. Астатнія атрымалі іншыя тытулы:
званне “Рыцар “Дамскі ўгоднік” дасталася Несцеру Д.,
“Рыцар “Адважнае сэрца” – Раманоўскаму У.,
“Рыцар “Дон Кіхот” – Алеферовічу М.,
“Рыцар-інтэлектуал” – Пенда У.,
“Рыцар “Майстар вершаванага радка” – Дробуш У.
Найбольш запамінальным для вучняў стаў Дзень дублёра, калі вучні 10-11 класаў праводзілі ўрокі беларускай мовы і літаратуры ў 3-6 класах. Настаўнікі-дублёры (Майсейчык Н., Чылека Ю., Пікта Я., Лазуткіна Н., Мінько Д., Авакімян М., Звярко Р.) аказаліся надзвычай лаяльнымі настаўнікамі (не жаднымі на адзнакі!).
На перапынках таксама было вельмі весела: вучні 1-5 класаў з ахвотай прымалі ўдзел у беларускіх народных гульнях, якія для іх арганізавалі старшакласнікі.
У сераду былі наладжаны “Вячоркі ў Паўлінкі”. Песні, скокі, народныя прыгаворкі не аставілі раўнадушнымі нікога з прысутных. Цярэшка, Паўлінка, пан Быкоўскі павесялілі гледачоў. Для дзевяцікласнікаў ў гэты ж дзень праводзілася інтэлектуальна-пазнавальная гульня “Жыву ў Беларусі і тым ганаруся”.
“Самым смачным” днём Тыдня быў чацвер. Вучні 1-4 класаў і іх бацькі арганізавалі сапраўдныя святочныя сталы ў рамках Свята “Беларускія прысмакі”: бліны, аладкі, грыбы, пірагі, агуркі – усяго не пералічыш! Ніхто галодным не застаўся!
